E Diz medievalo katar e Mehadia

Kana ʒas andar o than but śukar le Banatosqo Plajutno, and-o drom karing e Orśova, varesave kilometrojenθar katar ol Panǎ Herkulane, kirre jakha si cïrdine katar ol peravimata jekhe zorǎrimasqe purano. Kadala si p-o plaj Barkan andar e Mehadia, haj sikaven o than kaj vazdinǒlas maj anglal jekh śerutni diz medievalo. 

Vazdini and-o śeliberś XIII katar e familia nobiliaro Gutkeled, e Diz medievalo katar e Mehadia kerdili and-e vremǎ jekh punkto strateʒiko śerutno and-o sistemo le arakhimasqo le frontieraqo le Thagarimasqo magǎro. Vaś varesode berśa, and-o śeliberś XV, sas vi kher le kavalerenqo teutonǎ. Maj palal, sas zorǎrdi katar o Janku le Hunedoaraqo, haj sas la jekh rolo śerutno and-o maripen kontra o Thagaripen Otomano. 

Ages, ol peravimata akharen tut te dikhes vi tu jekh kotor andar e istoria le thanesqi, kadja ke na beś te godisares tut prǎ but! O drom ʒi kothe na-i pharo! 

---

Xarno istoriko rodinipen

E jekhtovar kana sas xramosardi and-ol lila e Diz katar e Mahadia si and-o berś 1323, kaj xramol pa laθe ande jekh lil kerdo kana sas thagar o Karol Robert de Anjou.

Voj sas lini katar o thagaripen magǎro, haj e diz avela rig andar o sistemo le komitatojenqo bänäceano, roloça militaro. Maśkar ol berśa 1429-1435, k-e Mehadia sas len kher le kavaleren teutonǎ, andine le thagaresθar Sigismund de Luxemburg.

And-o śeliberś XVI, e diz perel and-o vast le xoraxajenqo.

Kana sas o dujto maripen turko-austriako (1737-1739), e diz katar e Mehadia sas lini katar ol xoraxaja. O zorǎripen avela peravdo ćak and-o śtarto maripen turko-austriako (1788-1791).

---

Bukǎ arhitekturalo

E diz medievalo katar e Mehadia sas vazdini p-o than o tang le plajesqo Barkan, ande jekh than ućo, trujardo bare xïvenθar. K-o zorǎripen areselas pes numaj katar o nordo, haj kadja, vazdinǎs pes kathe o śerutno turno, jekhe bazaça heksagonalo haj mare zidoja, thule de 2,5 metrǎ haj uće maj but de 16 metrǎ.  O śerutno turno sas les jekh parteri bangǎrdo haj maj but etaźoja, save sas xulavde planśeenθar thode p-ol zidoja. So trebul te phenas si ke ande lesqo vazdipen, sas labǎrde prade marimasqe romano. 

And-o śeliberś XV o zorǎripen sas zorǎrdo, haj ol idoja sas ućǎrde haj maj kerdǎs pes jekh turno ćirkularo. Jekh aver turno sas arakhlo paśa e porta. O giripen andre sas kerdo pe jekh podo kilença barrutne. Jekh drom kaj nakhelas andar jekh śanco xunavdo and-o barr ingerelas and-o zorǎripen.

---

Bukǎ jekhutne kaj ʒives len

Kana san and-e Mehadia, trebul te keres jekh drom k-e Kaskada Bobot, kaj xakǎresa tut cïrdino katar e natura veśali, ama vi katar o spektakolo dino katar o pani savo perel. Arakhes la p-e xarr o Sfïrdino Baro, trine kilometrojenθar katar o maśkar le komunaqo. P-o drom veśesqo ʒal pes vurdoneça terenosqo, bićikletaça haj telal. 

Jekh vazdipen interesanto le naturaqo si e Rïpa e Kali, jekh rezervacia ʒeoloʒiko, kaj dikhesa forme reliefosqe sar na prǎ maj si. 

Haj kana kames te dikhes ol peravimata istoriko, k-e Mehedia daśtis te dikhes na numaj e Diz medievalo, ta vi o Kastro romano Praetorium haj e Khangeri pharavdi.