E Kula Poenaru

Te ʒasa andar o than plajutno le Olteniaqo haj arakhes niśte vazdimata bare, duvarença thule haj etaźoja, te ʒanes ke kadala si ol prinʒarde kule, khera zorǎrde le boierenqe oltenǎ, vazdine and-ol śeliberśa XVIII-XIX.

E Kula Poenaru andar o gav Almäź, o źudeco Dolź, inkerel vi voj e amprenta le śeliberśenqi nakhle. Kathe, andar o berś 1904 kana sas dini le gavesqi katar o George Poenaru, si e śkola.

Laqi paramići astarel and-o berś 1764, kana o boieri Barbu Poenaru vazdinǎs la. E Kula sas phabardi zorales dujvar haj, pala so izdravdili e phuv and-o berś 1838, xasardǎs laqe etaźoja ol oprutne. 

Ages, o vazdipen le śkolaqo kidel sǎ so maj aćhilǎs andar e Kula Poenaru: jekh vestibulo katar astarenas ol śopnǎ karing ol etaźoja haj jekh than baro, le laturença 8 metrěnqe, ućo de 5 metrǎ, ućhardi jekhe boltaça barvali, po śtare lunetença pe fiesavi latura. 

O jekhutnipen kadale kulaqo beśel and-ol fresće laqe but śukar. Andar o maśkar istoriko le purane kulaqo sas rig duj thana śerutne: e bolta, barvales xurǎvdi stukaturença motivojença lulugěnqe haj medalionoja line andar ol paramićǎ le Esoposqe haj o vestibulo, ućhardo vi vov jekhe boltaça ćilindriko.  

Si jekh than laćho te del le siklǒvnenqe, ande fiesavo ges, ama vi le phirutnenqe, jekh modelo zorǎrimasqo pand-o baripen le vazdinitorenqo. 

Pa e familia Poenaru xramosardǎs pes but. O anav Poenaru avel katar o than kaj sas len and-o hotari le gavesqo Poiana, o źudeco Gorź.

And-o śeliberś XVI, ol boierǎ andar e  Poiana kerde o nǎmo prinʒardo le anaveça Poenaru. O Barbu andar e Poiana kerdilo jekh punkto śerutno vaś lesqe ćhavorre, save xulavdile ande but lokaliteturǎ andar ol thema romïnisko and-ol trin śeliberśa save nakhle. 

O Barbu andar e Poiana, postelniko, klućeri, o maj baro dorobancenqo maśkar ol berśa 1624-1638, areslǎs maśkar ol bare dragätorǎ le themesqe. Vov sas phirtuno, khethanes le Matejoça Basarab, saves vazdinǎs les sode sas xulaj. 

Te aresesa ande kadava than daśtis te dikhes si e Khangeri ol Sfincǎ Voievozǎ – than kultosqo reliʒioso vazdino sa katar o Barbu Poenaru and-o berś 1878, savo ćajlilǎs varekana vi le Nikolajosqe Jorga.

Aver trin monumentoja istoriko si thode paśa o than vazdimasqo la Kulaqo Poenaru, sar si o Sito Arheoloʒiko katar o Almäź, kaj si dur 200 metrojenθar katar e śkola, haj vi ol thana neolitiko haj le epokaqe romano, ama kadala na daśtil pes te aven dikhle.